***********************************************************************************************
ಎಲ್ಲವೂ ಸರಿಯಿದ್ದಾಗ
ಅರಿವಿರಲಿಲ್ಲವೆನೆಗೆ 
ನಾ ಒಂಟಿಯಂದು/
ಮೊನ್ನೆ ಜ್ವರ ಬಂದು
ಯಾರೂ ಇಲ್ಲದೆ ನರಳಿದಾಗ
ಬೇಕೆನಿಸಿತ್ತು, ಜಂಟಿಯೊಂದು//
***********************************************************************************************

ಜಿಜ್ಞಾಸೆ

***********************************************************************************************
ಎಂದಿಗೂ ನೀ ತಿಳಿಯಬೇಡ 
ನೀನೇ ಪಕ್ವವೆಂದು
ಕಲಿಕೆಗೆಂದೂ ಕೊನೆಯಿಲ್ಲ
ಉರಿಯುವ ಸಣ್ಣ ಬತ್ತಿಗೂ 
ಹೊಯ್ಯಬೇಕು ನಿರಂತರ ತೈಲ
ಅದರ ಬದುಕಿರುವವರೆಗೂ
ಅವೆರಡನೂ ಹೊತ್ತ ದೀಪದ ಕಂಬಕೆ 
ತಿಳಿದಿಲ್ಲ ತನ್ನ ಬುಡಕೆ ಬೆಳಕಿಲ್ಲವೆಂದು


***********************************************************************************************

ಆದರೂ ಪ್ರಜ್ಞೆಯಿರಬೇಕಾಗಿತ್ತು

***********************************************************************************************  
  ವರ್ಷವೆಲ್ಲಾ ಪರದಾಡುತ್ತ...

ಮೌಲ್ಯವಿಲ್ಲದ ಅನಿಸಿಕೆಗಳಿಗೆ
ಬಲಿಯಾಗಿ/
ಸುತ್ತಲಿನ ವಾತಾವರಣಕ್ಕೆ
ಅಡಿಯಾಳಾಗಿ/
ತರಕಾರಿ ಮಾರುಕಟ್ಟೆಯೊಳಗಿನ
ವ್ಯಾಪಾರದಂತೆ ನಿತ್ಯವೂ
ನಡೆಯುತ್ತಿರುವುದು ಚೌಕಾಶಿ/

ಆದರೂ ಪ್ರಜ್ಞೆಯಿರಬೇಕಾಗಿತ್ತು...

ದೇವರ ಕಾಣಲು ಜಾತ್ರೆಯ ದಿನವೇ ಬೇಕು/
ಕಾಲ್ತುಳಿತಕ್ಕೆ ಸಿಕ್ಕಿ ನರಳುವ ಆ ಯಾತನೆ
ಯಾರಿಗೆ ತಾನೇ ಬೇಕು?
ಆದರೂ ಅದು ಸಂಪ್ರದಾಯ!
ಹಾಗಾದೆಡೆ
ದೇವರು ಬೇರೆಯ ದಿನವು ಗುಡಿಯ ತ್ಯಜಿಸುವನೇ?
ಅದು ಕೇವಲ ಜಿಜ್ಞಾಸೆ!

ಆದರೂ ಪ್ರಜ್ಞೆಯಿರಬೇಕಾಗಿತ್ತು...

ಮಂಜು ಮುಸುಕಿದೆ
ಕಾಣದ ದಾರಿಗೆ/
ನಿತ್ಯವೂ ನಡೆಯುತ್ತಿದೆ ಸ್ಪರ್ಧೆ/
ಸೂರ್ಯನ ಕಿರಣ ಬರುವತನಕ
ಕಾಯುವ ಸೈರಣೆಯಿರಲಿಲ್ಲವೆಮಗೆ!

ಆದರೂ ಪ್ರಜ್ಞೆಯಿರಬೇಕಾಗಿತ್ತು...

ವಿದ್ಯಾರ್ಥಿಗೆ ಅಂಕ ಗಳಿಕೆಯ ಒದ್ದಾಟ
ಪರೀಕ್ಷೆಯ ಹಿಂದಿನ ದಿನದಂದು!
ಅಪ್ಪನಿಗೆ ತಳಮಳ ಮಗಳ ಮದುವೆಯ
ಹಿಂದಿನ ದಿನದಂದು!
ಅಂತ್ಯವಾಗುವ ಹೊತ್ತಿಗೆ
ಎಲ್ಲವೂ ಬರುವುದು ಒಮ್ಮೆಯೇ
ನಮ್ಮ ಬಳಿ ಇಲ್ಲದಿರುವುದೊಂದೇ
ಅದು ಸಮಯ! ಅದು ಸಮಯ!

ಅದಕೆ ಪ್ರಜ್ಞೆಯಿರಬೇಕಿತ್ತು//

---ಜಿ.ಪಿ.ಗಣಿ---
*********************************************************************************************** 

ಪ್ರೀತಿಯ ಸಾಗರ

***********************************************************************************************
ನಿನ್ನಯ ಮನವೆಂಬ ಪ್ರೀತಿಯ ಸಾಗರದಲ್ಲಿ
ತೇಲುವ ಪುಟ್ಟ ನೌಕೆ ನಾನು /
ಜೋಪಾನವಾಗಿ ದಡವ ಸೇರಿಸೆನ್ನನು /

ನಿನ್ನಲೆಯ ಅಬ್ಬರಕೆ ನನ್ನಲ್ಲಿ ಉಂಟಾಗುವುದು ಆಗಾಗ ಏರಿಳಿತ /
ಕೃಪೆ ತೋರಿ ಕಡಿತಗೊಳಿಸುವೆಯಾ ನಿನ್ನಯ ಕುತೂಹಲದೊರೆತ /

ಒಮ್ಮೊಮ್ಮೆ, ನಿನ್ನೊಳಗೆ ಮುಳುಗುವ ಆಸೆ
ಆದರೆ ನಾ ಸ್ಥಿರವಾಗುವೆ /
ನಾ ನೀನಾಗುವೆ /
ನನಗದು ಸಲ್ಲ ಓ ಮುದ್ದು ಗಿಣಿಯೆ...
ಬಾಳ ಹಾದಿಯಲಿ ನಿನ್ನೊಡನೆ
ನಿರಂತರ ಚಲಿಸುವ ಆಸೆ /

ಆ ಹಾದಿಯ ನಡುವೆ ಸಿಕ್ಕ
ಪ್ರೀತಿಯ ಮಾರ್ಗ ನೀನು /
ಆ ಮಾರ್ಗವ ದಾಟಿ
ದಡವ ಸೇರಲು ಬಂದವನು ನಾನು /

ನಿನ್ನೊಡನೆ ಕಳೆದ ಈ ಕ್ಷಣಗಳು
ಇನ್ನಷ್ಟು ಇಮ್ಮಡಿಯಾಗಿಸಿವೆ
ನಿನ್ನೊಡನೆ ಆಟವಾಡಲು
ಬಾಳ ಪಯಣ ಮುಂದುವರೆಸಲು...

ದಡವಿರದ ಹಾದಿಯ ಕಾಣುತಿರುವೆನು
ಹಾಗೊಮ್ಮೆ ದಡವಿದ್ದರೆ ಅದು ನಮ್ಮಿಬ್ಬರ
ಸಮ್ಮಿಲನವಾಗಿರಲೆನ್ನ ಗಿಣಿಯೆ

ನಾ ತಟಸ್ಥ / ನೀನೂ ತಟಸ್ಥ /
ಅದುವೇ ನಮ್ಮಯ ಅಂತ್ಯ //

---ಜಿ.ಪಿ.ಗಣಿ---

*********************************************************************************************** 

ಗಾಳಿಯಿಲ್ಲದೆ ಹೊಗೆಯಾಡದು

***********************************************************************************************
ಕಣ್ಣು ನಾನಾದರೆ /
ಅದರೊಳಗಿನ ದೃಷ್ಟಿ ನೀನು //

ಚರ್ಮ ನಾನಾದರೆ /
ಅದಕೆ ಜೀವ ತುಂಬುವ ಸ್ಪರ್ಶ ನೀನು//

ಕಿವಿ ನಾನಾದರೆ /
ಅದರೊಳಗಿರುವ ತಮಟೆ ನೀನು //

ಮೂಗು ನಾನಾದರೆ /
ಅದನು ಅನುಭವಿಸುವ ಸುಗಂಧ ನೀನು //

ಬಾಯಿ ನಾನಾದರೆ /
ಅದರಿಂದ ಹೊರ ಬರುವ ಮಾತು ನೀನು //

ದೇಹ ನಾನಾದರೆ /
ಅದರೊಳಗಿನ ಆತ್ಮ ನೀನು //

ಹೃದಯ ನಾನಾದರೆ /
ಅದರೊಳಗಿನ ಉಸಿರು ನೀನು //

ನೀನಿರುವವರೆಗೂ ನಾ
ಸಜೀವ /
ನೀನಿಲ್ಲದ ನಾನು, ಕೇವಲ
ನಿರ್ಜೀವ //

---@ - ಜಿ.ಪಿ.ಗಣಿ -@--

*********************************************************************************************** 

ಪ್ರೀತಿಯ ಭಕ್ತಿ

***********************************************************************************************
ಓ ಗುಲಾಬಿ,
ನಿನ್ನ ಕಂಡಾಗಲೆಲ್ಲ
ನನ್ನ ನಾ ಮರೆಯುತ್ತೇನೆ
ಕಾರಣ ನಿನ್ನ ಮೇಲಿರುವ
ಪ್ರೀತಿಯ ಭಕ್ತಿ !!
ಧ್ಯಾನದಲ್ಲಿದ್ದೇನೆ.
ಕಣ್ಣ ರೆಪ್ಪೆಯೂ ಬಡಿಯದಂತೆ
ನೀ ನೋಡಿಕೋ!!!

***********************************************************************************************

ಹುಚ್ಚನ ಮದ್ವೇಲಿ ಬಿಟ್ಟವ್ನೆ ತ್ರಾಣ!

*********************************************************************************************** 
 ಹೊಸ ವರುಷದ
ಹರುಷದಲಿ
ನಾಲ್ಕು ಪೆಗ್ಗು ಹೆಚ್ಚು
ಒಳ ಹೊಕ್ಕಿತ್ತು !!
ಮುಫ್ತಾಗಿ ದೊರೆಯಿತೆಂದು
ಸುಸ್ತಾಗಿ ಕರುಳು...
ತಿಂದದ್ದ ಪೂರ್ತಿ
ಹೊರ ಹಾಕಿತ್ತು!!
*********************************************************************************************** 

// ಡವ-ಡವ //

*********************************************************************************************** ನಿನ್ನ ಮುಂಗುರುಳ
ಕಂಡಾಗಲೆಲ್ಲ...
ಎನ್ನೆದೆಯೊಳಗಿನ
ಕೀಲಿಮಣಿಗಳು
ಸಂಗೀತ ಲಹರಿಯನ್ನೇ
ಸೃಷ್ಟಿಸುತ್ತವೆ!
*********************************************************************************************** 

ಆಸೆಯ ಚಿಗುರೆಲೆ

***********************************************************************************************
ಚಿಗುರಿ ಸಸಿಯಾಗಿ
ಬೆಳೆಯುವ ತನಕ
ತಿಳಿದಿರಲಿಲ್ಲವೆನಗೆ
ನನ್ನೊಳಿನ ಆಸೆಯೆಂಬ
ಹಸಿರೆಲೆಗೆ ಸಾವಿದೆಯೆಂದು

ಆಸೆಯ ಚಿಗುರೆಲೆ ಜನುಮ
ತಳೆದಾಗ ಇದ್ದದ್ದು, ತಿಳಿ ಹಸಿರು
ಅದೇ ಕನಸೆಂಬ ಉಸಿರು
ಕನಸು ನನಸಾದೆಡೆ
ಮನಸಿಗೆ ಉಲ್ಲಾಸದ ಪಸಿರು
ಅದೇ ಕಡು ಹಸಿರು

ನನಸಾಗದೇ ಅಳಿದವು
ಎಷ್ಟೋ ಕನಸುಗಳು
ಮತ್ತೆ ಚಿಗುರುವ ಆಸೆ
ಕಡು ಹಸಿರಾಗುವ ಆಸೆ

ಕಾಯುತಿರುವೆನು
ವಸಂತ ಮಾಸಕೆ
ಹೊಸ ವರುಷಕೆ
ಹೊಸ ಹರುಷಕೆ

ಬೆಳೆಯುತ್ತಿರುವುದೀ ದೇಹವು
ನಿತ್ಯವೂ ಒಣಗುತ್ತಾ
ಮತ್ತಷ್ಟು ತೊಗಟೆಯೆಂಬ
ಪೊರೆಯ ಕಳಚುತ್ತಾ
ಇರುವ ಆಸೆಯೆಂಬ
ಎಲೆಗಳನೆಲ್ಲಾ ಉದುರಿಸುತ್ತಾ
ಆದರೂ, ನಾನು ಮರೆತಿಲ್ಲ
ಮತ್ತೆ ಮತ್ತೆ ಚಿಗುರುವುದನು...

ಛಲದಿಂ ನಿಲ್ಲುವೆ ಆಸೆಗಳಿರುವತನಕ
ಉಸಿರು ಬಸಿರಲಿ ಬೆಳೆಯುವತನಕ
ಹಸಿರು, ಕಂದಾಗಿ ಅಳಿಯುವತನಕ


~ಜಿ.ಪಿ.ಗಣಿ~

*********************************************************************************************** 

ಪಂಚ್ ತಂತ್ರ

*********************************************************************************************** 
ನಮ್ಮೆಲ್ಲರ ಬದುಕಿಗಿದೆ ಸ್ವಾತಂತ್ರ
ನೀನೆಂದಿಗೂ ಮಾಡಬೇಡ ಕುತಂತ್ರ
ಮಾಡಿದರೆ ನಿನ್ನ ಬದುಕಾಗುವುದು ಅತಂತ್ರ
ಕೂಡಿ ಬಾಳುವುದೊಂದೇ ಬದುಕಿನ ಮೂಲಮಂತ್ರ
ನಾವು ಅರಿತು ನಿಮಗೂ ತಿಳಿಸುವುದೇ ನಮ್ಮ ಪಂಚತಂತ್ರ
ಅಲ್ಲ ಅಲ್ಲ ಪಂಚ್ ತಂತ್ರ!
***********************************************************************************************