ನಲ್ಮೆಯ ಗೆಳೆಯ -ಗೆಳತಿಯರಿಗೆಲ್ಲ ನನ್ನ ಹೃದಯವಾಣಿಗೆ ಪ್ರೀತಿಯ ಆದರದ ಸ್ವಾಗತ... ನನ್ನ ಮನದಾಳದ ಮಾತು ಇಲ್ಲಿ ಬಿಂಬಿಸಿದ್ದೇನೆ ಬಿಡುವಿದ್ದಾಗ ಓದಿ ಮನಸ್ಸಿನ ನೋವನ್ನು ಸ್ವಲ್ಪ ಹಗುರ ಮಾಡಿಕೊಳ್ಳಿ ಜೊತೆಗೆ ಸಲಹಿ ಹಾರೈಸಿ :))

Search This Blog

Tuesday, March 31, 2015

ಕಣ್ಣ ಅಣೆಕಟ್ಟನೊಡೆದು ಬರುವ ದುಃಖದ ನೀರಿನಲಿ
ನಿನ್ನ ಮೇಲಿನ ಪ್ರೀತಿಯ ಹೆಸರಿತ್ತು.
ಆ ಹೆಸರಲಿ ಉಪ್ಪು ಇದೆಯೇ ಎಂಬ ಗುಮಾನಿಯಿಂದ
ಸವೆದರೆ,
ಅದೇಕೋ ಬಲು ಖಾರವಾಗಿತ್ತು,!!

Tuesday, March 10, 2015

ಅಸ್ತಿತ್ವ?
____
ಹುಟ್ಟುವಾಗ ಕರುಳ ಬಳ್ಳಿಯ ಕಿತ್ತು
ನೋವ ಮುದ್ರೆಯನು ಹೊಕ್ಕುಳಲಿ ಹೊತ್ತು
ನಿರಂತರ ಸಾಗಿದೆ ಈ ಬದುಕು!
ಬಿತ್ತುವ ಬೆಳೆಯು ಮಳೆಯ ಸೊತ್ತು
ಬೆಳೆದ ಫಸಲಿಗೆ ಮಧ್ಯವರ್ತಿಯ ತಾಕೀತು
ಬೆವರ ಹನಿಗೆ ಬೆಲೆಯಿಲ್ಲದೇ
ಉದರ ನಲುಗಿದೆ
ಮುದ್ರೆ ಅಳುತಿದೆ
ಮತ್ತೆ ಸೋತು ಸೋತು!!

ಬೆಳೆವ ಪೈರಿಗೆ ಗೊಬ್ಬರದ ಕೊರತೆ
ಉತ್ತುವ ಮಣ್ಣಿಗೆ ಕಳೆಯ ಒರತೆ
ಆಂತರ್ಯದ ಶಕ್ತಿಯು ಕುಂದಿಹುದು
ಆರದೋ ಅಸ್ತಿತ್ವದ ಬೇಗೆಯಿಂದ
ದುಡ್ಡಿನ ಮರಕಿಂದು ವಸಂತ ಕಾಲ
ತಿನ್ನುವ ಕೂಳಿಗೆ ಬರುತ್ತಿದೆ ಬರಗಾಲ

ಬಿತ್ತುವ ಭೂಮಿಯ ಸ್ವಾತಂತ್ರ್ಯವನು
ಉತ್ತುವ ರೈತನ ಹೃದಯವನು
ಕನಿಕರವಿಲ್ಲದೇ ಚರ್ಮವ ಸುಲಿದು
ಇಂಚಿಂಚು ಕೊಚ್ಚಿ ರಕ್ತವ ಹೀರುತಿಹರಿಲ್ಲಿ
ನರರಕ್ಕಸರು

ಆರದೋ ತೀಟೆಗೆ ಬಿತ್ತಿದ
ಬೀಜವಾಗಿ
ಬೆಳೆದು ಮರವಾಗಿ
ಅಳಿಯುವ ಬದುಕಿಗೆ
ಯಾಕಿಷ್ಟು ವ್ಯಾಮೋಹ?

~ಜಿ.ಪಿ.ಗಣಿ~

Thursday, March 5, 2015

WHATSappu!!!!!


ನಡೆದೈತೆ ನಡೆದೈತೆ
ಹುಚ್ಚು ಆಟವೊಂದು
ಈ ಲೋಕದಾ...ಗೆ......
ಕೇಳ್ತೈತೆ ಕೇಳ್ತೈತೆ
ಅದು ಸೆಲ್ ಫೋನು ಒಂದು
ಈ ಹೃದಯದಾ.....ಗೆ .....
ಒತ್ತೋಕೆ ಮನ್ಸು ಕಾಯ್ತಿರ್ತದೆ
ಕುಣಿಯೋಕೆ ಬೆರ್ಳು ರೆಡಿ ಇರ್ತದೆ
ಅಳಲೊಂದು ಮುಖವಾಡ,
ನಗಿಸೋಕೆ ಪವಾಡ
ಗುದ್ದಾಟವೋ .....
ಇದು,
ಸುಳ್ಳಿನ ಅಖಾ.....ಡ!!
ನಡೆದೈತೆ ನಡೆದೈತೆ
ಹುಚ್ಚು ಆಟವೊಂದು
ಈ ಲೋಕದಾ...ಗೆ......
ಲವ್ವಂತೆ ನಗಿಸೋಕೆ ಗಂಡಿದ್ದರೆ
ಡವ್ವಂತೆ ಸುತ್ತೋಕೆ ಹೆಣ್ಣಿದ್ದರೆ
ಯಾರ್ಯಾರು ಕಾರ್ಟೂ....ನು
ಆರಾರಿಗೋ!
ಮನ್ಸೊಂದು ಇನ್ನೊಂದು
ಎಲ್ಲೆಲ್ಲಿಗೋ!
ನಡೆದೈತೆ ನಡೆದೈತೆ
ಹುಚ್ಚು ಆಟವೊಂದು
ಈ ಲೋಕದಾ...ಗೆ......
~ಜಿ.ಪಿ.ಗಣಿ~

Tuesday, March 3, 2015

ಹುಳುಕು ಹಲ್ಲು!!
_________
ಸಿಹಿಯೆಂದು ಸವಿನೆನಪಿನ
ಚಾಕ್ಲೇಟು ಜಗಿದು-ಜಗಿದು 
ಹಲ್ಲು ಹುಳುಕಾಗಿ
ನೋವು ಹೆಚ್ಚಾಗಿ
ಅದೆಷ್ಟು ದಿನ ಬಳಲಿದೆನೋ...
ಮತ್ತೆ ಆ ಸವಿನೆನಪಿನ
ಚಾಕ್ಲೇಟನಗಿಯಲು
ಹಲ್ಲೇ ಇಲ್ಲದಂತಾಯ್ತೆ!!
ಅತಿಯಾದರೆಲ್ಲವೂ ಹುಳುಕೆ ??