ಹೃದಯವಾಣಿ

ಅಸ್ತಿತ್ವ?
____
ಹುಟ್ಟುವಾಗ ಕರುಳ ಬಳ್ಳಿಯ ಕಿತ್ತು
ನೋವ ಮುದ್ರೆಯನು ಹೊಕ್ಕುಳಲಿ ಹೊತ್ತು
ನಿರಂತರ ಸಾಗಿದೆ ಈ ಬದುಕು!
ಬಿತ್ತುವ ಬೆಳೆಯು ಮಳೆಯ ಸೊತ್ತು
ಬೆಳೆದ ಫಸಲಿಗೆ ಮಧ್ಯವರ್ತಿಯ ತಾಕೀತು
ಬೆವರ ಹನಿಗೆ ಬೆಲೆಯಿಲ್ಲದೇ
ಉದರ ನಲುಗಿದೆ
ಮುದ್ರೆ ಅಳುತಿದೆ
ಮತ್ತೆ ಸೋತು ಸೋತು!!

ಬೆಳೆವ ಪೈರಿಗೆ ಗೊಬ್ಬರದ ಕೊರತೆ
ಉತ್ತುವ ಮಣ್ಣಿಗೆ ಕಳೆಯ ಒರತೆ
ಆಂತರ್ಯದ ಶಕ್ತಿಯು ಕುಂದಿಹುದು
ಆರದೋ ಅಸ್ತಿತ್ವದ ಬೇಗೆಯಿಂದ
ದುಡ್ಡಿನ ಮರಕಿಂದು ವಸಂತ ಕಾಲ
ತಿನ್ನುವ ಕೂಳಿಗೆ ಬರುತ್ತಿದೆ ಬರಗಾಲ

ಬಿತ್ತುವ ಭೂಮಿಯ ಸ್ವಾತಂತ್ರ್ಯವನು
ಉತ್ತುವ ರೈತನ ಹೃದಯವನು
ಕನಿಕರವಿಲ್ಲದೇ ಚರ್ಮವ ಸುಲಿದು
ಇಂಚಿಂಚು ಕೊಚ್ಚಿ ರಕ್ತವ ಹೀರುತಿಹರಿಲ್ಲಿ
ನರರಕ್ಕಸರು

ಆರದೋ ತೀಟೆಗೆ ಬಿತ್ತಿದ
ಬೀಜವಾಗಿ
ಬೆಳೆದು ಮರವಾಗಿ
ಅಳಿಯುವ ಬದುಕಿಗೆ
ಯಾಕಿಷ್ಟು ವ್ಯಾಮೋಹ?

~ಜಿ.ಪಿ.ಗಣಿ~