ಓ ಪ್ರೀತಿಯೇ ನೀನೆಂದಿಗೂ ಆಗದಿರು ನೀಲಿ ವರ್ಣದ ಸುಂದರಿ !!!

***********************************************************************************************
ಜೇಬಲ್ಲಿ ಕಾಸಿಲ್ಲ
ಮನದಲ್ಲಿ ಅಳುಕಿಲ್ಲ
ಬಿಕ್ನಾಸಿ ಬದುಕಿಗೆ ಚೌಕಾಸಿ ಬೇಕು
ಪ್ರೀತೀನ ಪಡೆಯಲು ತಿರ್ಕೆ ಶೋಕಿ ಸಾಕು

ತೋರಿಕೆಯ ಈ ಪ್ರೀತಿ
ಇದಕೆ ಆಯಸ್ಸು
ಕೇವಲ ಒಂದು ದಿನ
ಅದುವೇ ಪ್ರೇಮಿಗಳ ದಿನ

ನಿತ್ಯವೂ ನಡೆಯುವುದು ಕದನ
ಇದುವೇ ನೆಲೆಯಿಲ್ಲದ ಸದನ
ಮಾತು ಮಾತಿಗೂ ಬದಲಾಗುವ ವದನ
ತಣ್ಣಗಾಗಲು ಹಾಗೊಮ್ಮೆ ಹೀಗೊಮ್ಮೆ ಚುಂಬನ

ಆರು ಇದ್ದರೆ, ಆ ಹುಡುಗಿ
ಮೂರೂ ಬಿಟ್ಟರೆ, ಈ ಹುಡುಗಿ
ಅವಳೇ ವಯ್ಯಾರದ ಬೆಡಗಿ
ಹುಡುಗನಾಗುವನು ಸೂಲಂಗಿ
ಅವಳ ನೆನಪಲ್ಲೇ
ಕೊರಗೀ ಕೊರಗೀ

ನೆಪಕ್ಕಷ್ಟೇ ಆಕೆ ಸ್ನೇಹಿತೆ
ಇವನಲ್ಲಿ ಇರುವುದೆಲ್ಲ ದುರ್ನಡತೆ
ಅವಳೂ ಏನು ಕಮ್ಮಿ ಇಲ್ಲ
ಇವನಿಗಿಂತ ಸಿಕ್ಕರೆ ಒಳ್ಳೆಯ ನಲ್ಲ
ಪರಾರಿಯಾಗಲು
ಹೊಂಚು ಹಾಕುವುದನು ಮರೆಯುವುದೇ ಇಲ್ಲ

ಪರಿಣಿತರಿವರೀರ್ವರು
ಅವರವರ ಚಪಲದ ಕಡೆಗೆ
ಅರಿವಿಲ್ಲದ ಈ ಪ್ರೀತಿಯ ಬೇಟೆ
ಮಾಡುತಿದೆ ನಿಷ್ಠೆಯ ಸುಲಿಗೆ

~ಜಿ.ಪಿ. ಗಣಿ~
***********************************************************************************************