ನಿತ್ಯವೂ ಸ್ವಾತಂತ್ರ

***********************************************************************************************
ಸುತ್ತಲೂ ಕತ್ತಲು 
ಮೇಘಗಳ ಹುಡುಕಾಟದಲ್ಲಿ 
ಎಲ್ಲವೂ ತಿಳಿಯಾಗುವುದು 
ಬೆಳಗಾಗುವ ಹೊತ್ತಿಗೆ...
ನಸು ಮುಂಜಾವಿನಲಿ 
ಚಿಗುರುವ ಹಸಿ ಕನಸುಗಳು
ಆಗಸದಿ ಮೆತ್ತಿಟ್ಟ ಶ್ವೇತವರ್ಣದ ಶಿಲ್ಪಗಳು
ಎತ್ತೆತ್ತಲೂ ಹಕ್ಕಿಗಳ ಗಾನಮಾಲೆ
ಕಣ್ಣಿಗೆ ಕಾಣುವುದೆಲ್ಲಾ ಹೊಸತು

ತಣ್ಣನೆಯ ಗಾಳಿಯ ಸಂಚಲನ
ಜಡ ದೇಹದೊಳಗೆ...
ನಿತ್ರಾಣ ಬದುಕಿಗೆ ಉಸಿರಾಡಲು ಅದೇನೋ ರೋಮಾಂಚನ
ಪ್ರಕೃತಿಯೊಳಗಿನ ಪ್ರತಿಕೃತಿಯ ಸವಿಯಲು ನಿತ್ಯವೂ ಜನನ
ಯಾರ ಹಂಗಿಲ್ಲದೇ ಕರ್ಮವೆಲ್ಲವೂ ನಡೆಯುತಿಹುದು
ಅಣು ಅಣುವಿನ ಜತನದಿಂದ
ಕಾಣದ ಮಾಯೆಯ ಆತ್ಮದ ಬಲದಿಂದ
ಸ್ವಾತಂತ್ರ್ಯದ ಸಲಾಕೆಯಿಂದ

ನೆನ್ನೆಯೆಂಬಾ ಬಂಧನದ ಬಿಡುಗಡೆಗಾಗಿ ಹೋರಾಟ
ನಾಳೆಯ ಕಾಣದ ಬದುಕಿಗೆ ತಿರುಳಿಲ್ಲದ ಸೆಣಸಾಟ
ಸ್ವಾತಂತ್ರ್ಯವಿಹುದಿಲ್ಲೀ... 
ನಿತ್ಯಕೆ-ಸತ್ಯಕೆ
ದಿನವೂ ಹಾರಿಸಬೇಕು
ಬಾಳಿನ ಹರುಷದ ವಿಜಯ ಪತಾಕೆ

~ಜಿ.ಪಿ.ಗಣಿ~ 
***********************************************************************************************