ಸ್ವಾಮಿ ವಿವೇಕಾನಂದ

ಜಗದಿ ಆಧ್ಯಾತ್ಮದ ಹಸಿವನ್ ಹೊತ್ತಿಸಿ
ಸಕಲ ಜೀವರಾಶಿಯೊಳಗನು ದಿಟ್ಟಿಸಿ
ಪರದೇಶವ ಸುತ್ತಿ ಸುತ್ತಿ
ಎಲ್ಲರ ಮತವೊಂದೇ,
ಎಲ್ಲರ ಧರ್ಮವೊಂದೆಂದು
ಹೇಳಿದರು ತಮ್ಮ ಭಾಷಣದಿ
ಒತ್ತಿ ಒತ್ತಿ II

ವಿವಿಧ ಧರ್ಮಕೆ ಸಂಬಂಧವನು ಬೆಸೆದು
ಸ್ವಧರ್ಮದ ಹಿರಿಮೆಯನ್
ಗಿರಿ-ಶಿಖರದತ್ತೋಯ್ದ
ಮಹಾನ್ ಸಂತರಿವರು II

ಮಾತಿನ ತರಂಗಗಳಲಿ
ಎಲ್ಲರಾತ್ಮಬಲವನ್ ಅವರವರ
ಮುಷ್ಠಿಯೊಳಗಿರಿಸಿದವರು...
ದೇಹವನು ತ್ಯಜಿಸಿದರೂ
ಎಲ್ಲರಾತ್ಮದಲಿ ನೆಲೆಸಿದವರು

ಒಂದೊಂದು ನುಡಿಗಳಲದೆಷ್ಟು
ವಿದ್ಯುತ್ ಶಕ್ತಿಯು..
ಮೆದುಳ ನರಗಳನು
ಹೃದಯದಿ ಬಡಿತವನು
ಬಡಿದೆಬ್ಬಿಸುವ ಗುರುಯಿವರು

ಸಾಗರದಷ್ಟು ವಿವೇಕವನು ಹೊತ್ತು
ಅನಂದದೆಲ್ಲರ ಮನವನು
ಗೆದ್ದವರಿವರೇ
ನಮ್ಮ ನಿಮ್ಮೆಲ್ಲರ ಸ್ವಾಮಿ
ವಿವೇಕಾನಂದರು II

~ ಜಿ.ಪಿ.ಗಣಿ ~

ಪರೀಕ್ಷೆ ಪಾಠ ಇಲ್ಲಿಗೆ ಮುಗಿಯಿತು!

***********************************************************************************************
ಮೂರು ತಿಂಗಳ ಅವಧಿಯಲ್ಲಿ, 
ಮೂರು ದಿನದ ಓದಿನಲ್ಲಿ, 
ಮೂರು ಗಂಟೆಯ ಪರೀಕ್ಷೆ ಬರೆದು!
ಕೊನೆಯ ಮೂರು ನಿಮಿಷದ 
ಸಾರ್ಥಕತೆಯ ತಿಳಿಯುವುದೇ ಜೀವನ!

~ಜಿ.ಪಿ.ಗಣಿ~
***********************************************************************************************

***********************************************************************************************
ನೀನಿಲ್ಲದಿರೆ ನನ್ನ ಬಾಳು !
ಇಂದ್ರಿಯವಿಲ್ಲದ ದೇಹದಂತೆ 
ಭಾವನೆಯಿಲ್ಲದ ಮನಸ್ಸಿನಂತೆ 
ಪದಗಳಿರದ ಬಿಳಿ ಹಾಳೆಯಂತೆ
ನಿನ್ನ ಬಿಟ್ಟು ಎನ್ನ ಬಾಳು ನಶ್ವರ 
ನನ್ನ ಬಿಟ್ಟು ಹೋಗದಿರು ಓ 
:
:
:
:
:
:
:
:
:
:
:
:
:
:
ಆಸಕ್ತಿಯೇ !!

~ ಜಿ. ಪಿ. ಗಣಿ ~
***********************************************************************************************

ಸಮರದೋಳ್ ಇಚ್ಚಾಶಕ್ತಿಯ ಕೆಣಕಿ ಉಳಿದವರಿಲ್ಲ !!

***********************************************************************************************
ಆಗುವುದಿಲ್ಲವೆಂದು ಹಿಂದೆ ಹೋಗುವುದಿಲ್ಲ 
ಕಷ್ಟವೆಂದು ಸುಮ್ಮನೆ ಕೂರುವುದಿಲ್ಲ 
ಆದದ್ದು ಆಗಲಿ ಹೋದದ್ದು ಹೋಗಲಿ 
ಸಾರುವೆ ನಿನ್ನೆದುರು ಸಮರವ !
ತೋರುವೆ ನನ್ನಯ ಬಲವ !

ನಾಚಿ ನೀ ದೂರ ಓಡಬೇಕು !
ನನ್ನ ಒಂದೊಂದು ಬೆಳವಣಿಗೆಯ 
ಕಂಡು ನೀ ಹೆದರಿ ಮರೆಯಾಗಬೇಕು !

ನೋಡಿಯೇ ಬಿಡುವ ಬಾ ಚಿಂತೆಯೇ
ನೀನಾ ! ನಾನ !

~ ಜಿ.ಪಿ. ಗಣಿ ~
***********************************************************************************************

ಅನಾಥವಾಗುವ ಮುನ್ನ ಅನಂತವಾಗು!!

***********************************************************************************************
ಬರೆಯುವ ಕೈಗಳಿವೆ 
ಬೆರೆಯುವ ಮನಗಳಿವೆ 
ಮಾಸದ ಸವಿ ನೆನಪುಗಳು 

ಅಚ್ಚಳಿಯದೆ ಹಾಗೆ ಉಳಿದಿವೆ
ಸ್ಪಂದಿಸಲು ಮನವು
ಹಾತೊರೆಯುತಿದೆ
ಆದರದು ಸೋಮಾರಿತನಕೆ
ಸಿಕ್ಕಿ ಬಳಲುತಿದೆ
ಇದು ಅಂಜಿಕೆಯೋ ?
ಇದು ಸ್ವಾರ್ಥವೋ ?
ಇದು ಅಸಡ್ಡೆಯೋ ?
ಅನ್ಯರ ಜೊತೆ ಸೇರಿದೆಡೆ
ಮನಕೆ ದೊರೆವುದು
ಧೈರ್ಯವೆಂಬ ಸೇನೆಯ ಪಡೆ
ಬದುಕಿಗೆ ಸಿಗುವುದೊಂದು
ಶಿಸ್ತಿನ ನಡೆ !

~ಜಿ.ಪಿ.ಗಣಿ~
***********************************************************************************************

ಹಬ್ಬದ ಮೆರುಗು !!

***********************************************************************************************

ಪಾಶ್ಚಾತ್ಯ ಬದುಕಿಗೆ ವಾಲುತ್ತಿರುವ 

ಹೆಂಗಳೆಯರ ಮಹಾ ಪೂರ .....

ದಿನನಿತ್ಯ ಅದೆಂಥ ! ಬಳುಕು 

ನಡುಗೆಯ ವಯ್ಯಾರ ......

ಬಂತಮ್ಮ !! ಆಷಾಡ ಶುಕ್ರವಾರ ...

ಶ್ರಾವಣದ ಮಹಾಲಕ್ಷ್ಮಿಯ ಪೂಜೆಯ ವಾರ... 

ಬರಿದಾದ ಹಣೆಗೆ ಬಿತ್ತು  

ತಿಲಕ ಶ್ರೇಷ್ಟ ಸಿಂಧೂರ ....

ಮುಡಿಗೆ  ಮಲ್ಲಿಗೆಯ ಹೂವಿನ ಹಾರ ...

ಕೊರಳಿಗೆ ಏರುವ ಆಭರಣಗಳು ಬಲು ಭಾರ...

ಸೀರೆಯುಟ್ಟ ನೆರಿಗೆಗಳು ಅಪಾರ ...

ಆಹಾ ! ಭಾರತೀಯ ಹೆಣ್ಣಿನ ಅಂದವ ಮೆರುಗು ಗೊಳಿಸುವುದು 

ಈ ವಿಶಿಷ್ಟ -ವರ್ಣಮಯ  ಸಿಂಗಾರ ...

ಇಂತಹ ಹಬ್ಬಗಳಿಂದ ಆಗುವುದಲ್ಲವೇ 

ನಮ್ಮ ಸಂಸ್ಕೃತಿಯ ಜೀರ್ಣೋದ್ದಾರ !!!! 

-@(ಜಿ.ಪಿ.ಗಣಿ)@-
***********************************************************************************************

ಸಾರ್ಥಕ ಜೀವನ !!

***********************************************************************************************

ಹುಟ್ಟೆಂಬುದು..

ಹೆತ್ತ ತಾಯ

ಗರ್ಭದಿ ಹೊರ ಬರುವುದು ,

ಸಾವೆಂಬುದು..

ಭೂ - ತಾಯಿಯ 

ಗರ್ಭದೊಳ  ಹೊಕ್ಕುವುದು !!

ಈ ಬಂದು-ಹೋಗುವ 

ನಡುವಿನಂತರದಿ 

ಆ ಗರ್ಭ ಹೊತ್ತ ತಾಯರ 

ನಗಿಸಿ ಋಣವ ತೀರಿಸುವುದೇ ಸಾರ್ಥಕ ಜೀವನ!!

-@(ಜಿ.ಪಿ.ಗಣಿ)@-
***********************************************************************************************

ಓ ಅನಂತರೆ!!

***********************************************************************************************

ಅನಾಥರು ನಾವ್ ಅನಾಥರು 

ಎಂದು ಮರುಗಬೇಡಿ ಮನಗಳೇ

ಜಗದಿ ಸಂಬಂಧಗಳ ಬಲೆಯೊಳಗೆ 

ಬಿದ್ದೊದ್ದಾಡಿ ಹೊರಬರಲು 

ಕಾಯುತಿರುವ ಮನುಜರ  ನೋಡಿರೋ !

ನಿಮಗ್ಯಾವ  ಹಂಗಿಲ್ಲ ,

ನಿಮಗ್ಯಾರ ಭಯವಿಲ್ಲ ,

ನಿಮ್ಮಯ ಮನವು ತೋರುವುದು 

ತಾಯಿಯ ಮಮತೆಯ ,

ತಂದೆಯ ಪ್ರೀತಿಯ ,

ಹುಟ್ಟಿನಿಂದಲೇ ನಿಮ್ಮ 

ಅಸ್ತಿತ್ವದ ತಳಪಾಯವ 

ಗಟ್ಟಿಮಾಡುವ  ಸಾಮರ್ಥ್ಯವ 

ನೀಡಿದ ನಮ್ಮ ಶಂಭುಲಿಂಗನ ಕೊಂಡಾಡಿರೊ!!
-@(ಜಿ.ಪಿ.ಗಣಿ)@-
***********************************************************************************************

ಲಕ್ಷ್ಮೀ ಮಹಾತ್ಮೆ !!

***********************************************************************************************
ಕಾಸು ಕಂಡವನು
ಲೋಕ ಮರೆತಂತಾಯ್ತು
ಕಣ್ಣು ಕಾಣದವನು
ಲೋಕ ಅರಿತಂತಾಯ್ತು
ನಡುವೆ ಎನ್ನಯ ಮನವು
ಕೊರಗಿ ,ಸುಂದರ  ಅರಿವು 
ಹೃದಯಾಳದಲಿ ನಾಟಿ ನಿಂತಂತಾಯ್ತು !!!

-@(ಜಿ.ಪಿ.ಗಣಿ)@-
***********************************************************************************************

ಪ್ರೇಮದ ಸೆಳೆತ !!

***********************************************************************************************

ನನಗಿಂತ ನಿನ್ನ 

ಹೊತ್ತ ಹೃದಯ

ಭಾರವಾಯಿತೆನೆಗೆ,

ಎಷ್ಟು ತಡೆದರೂ 

ನಿನ್ನೆಡೆಗೆ  ವಾಲುತಿಹುದು ,

ನಿನ್ನಯ ಪ್ರೇಮದಿ
ಸಮತಟ್ಟಾಗಿದ್ದ

ಮನದ ನೆಲವೂ..
ಇಳಿಜಾರಾಯ್ತೆ!!

-@(ಜಿ.ಪಿ.ಗಣಿ)@-
***********************************************************************************************

ಆಸೆಗೊಂದು ಕಡಿವಾಣ

***********************************************************************************************
ಆಸೆಯೆಂಬುದು ಮನಸ್ಸಿಗೆ  ಅನ್ನಿಸಬೇಕು  ಅಲರ್ಜಿ 
ಮನಸಿಗೆ ಅದ  ಕಾರ್ಯಗತ ಮಾಡಲು ಬೇಕು ಮುತುವರ್ಜಿ !!! 
ಅದಾದರೆ ನಮಗೆ ಸಿಗುವುದು ಸಾಕ್ಷಾತ್ಕಾರಕೆ ಅರ್ಜಿ !!

-@(ಜಿ.ಪಿ.ಗಣಿ)@-
***********************************************************************************************

ವೀರ ಕವಿ

***********************************************************************************************

ಮನಸ್ಸೆಂಬ ಸಾಗರದೊಳಗೆ

ಅನುಭವಗಳ ಅಲೆಯನೆಬ್ಬಿಸಿ 

ಆ  ಅಲೆಯ ಮೇಲೆ ರಂಗು - ರಂಗಿನ 

ಆಟವಾಡಿಸುವ ಪದಗಳ ಜೋಡಿಸಿ 

ಮನದೊಳಗಿನ ನೋವು - ನಲಿವಿನ 

ಚಿತ್ರಣವ ಬಿಂಬಿಸುವ ಲೇಖನಿಯೆಂಬ 

ಖಡ್ಗ ಹಿಡಿದವನೇ ವೀರ ಕವಿ !!!!!

-@(ಜಿ.ಪಿ.ಗಣಿ)@-
***********************************************************************************************

ಆಹ್ವಾನದ ಕವಿತೆಗೊಂದು ಪ್ರತ್ಯುತ್ತರ

***********************************************************************************************

ಬರುತಿಹೆನು ಗೆಳೆಯ
ನಿನ್ನಯ ಆಹ್ವಾನದ ಕೂಟಕೆ ,
ಚಪ್ಪರಿಸಿ ತಿಂದು ತೇಗಲು
ಕಾಯುತಿಹುದು ನನ್ನ ಹೊಟ್ಟೆ
ನೀ ಮಾಡಿಟ್ಟ ಊಟಕೆ ,
ಹಸಿರೊತ್ತ ಭೂ ತಾಯಿಯ
ಹಾಸಿಗೆ ಸಾಕು ,
ತಂಪು - ಇಂಪಾಗಿ ಹಾಡುವ
ಸವಿಯಾದ ಗಾಳಿ ಬೇಕು .
ಎಲ್ಲವನು ಉಣಬಡಿಸುವ
ನೀ ಇತ್ತ ಈ ಪ್ರೀತಿಯ
ಕವಿತೆ ಸಾಕು !

                    -ಗಣಿ 
***********************************************************************************************

ಮೂಕವೇದನೆ

***********************************************************************************************

ವಿಸ್ಮಯ ಜಗದಿ ಅಳಲಾಡುವ 

ಬರಡು ದೇಹವೇ,

ನಿನ್ನೊಳಗಿನ ಆತ್ಮಕೆ 

ಇಷ್ಟೊಂದು ತಳಮಳವೇಕೆ ?

ಬೆಂಬಿಡದ  ಬೇತಾಳನ 

ಹಾಗೆ ಕಾಡುವೆ ಏಕೆ ?

ಈ ಮೂಕ ವೇದನೆ 

ನಾ ತಾಳಲಾರೆ 

ತಾಳಲಾರೆ !!

-@(-ಗಣಿ -)@-
***********************************************************************************************

ಪ್ರೀತಿಸುವ ಹೃದಯಕೆ

***********************************************************************************************

ಪ್ರಾಣವ   ಬಿಡದೆ 

ಪ್ರೇಯಸಿಯ ಒಲಿಸಲು 

ಮುಂದಾಗು ಮನವೇ ,

ನಿನ್ನ ಪ್ರೀತಿಯು 

ಅಚಲವಾದರೆ 

ಅದಕಿಲ್ಲ ಸಾವು ,

ಪ್ರಜ್ಞೆ  ತಪ್ಪಿದರೆ 

ನೀ ಸಹಿಸಲಾರೆ 

ಅದಕಾಗುವ ನೋವು ,

ಭಕ್ತಿಯನೊತ್ತ ಪ್ರೇಮ 

ಪೂಜಾರಿಯಾಗು ಮನವೇ 

ಭಕ್ತಿಯ ಮೆಚ್ಚಿ ಒಲಿಯದೆ 

ಆ ಪ್ರೇಮದೇವತೆ ಇರಳು!!

                          -ಗಣಿ 
***********************************************************************************************

ಓ ಮನಸೇ

***********************************************************************************************

ಓ ಮನಸೇ,

ನೀ ಕಲ್ಲೆಂದು ತಿಳಿದಿದ್ದೆ

ಆದರದು ಕರಗಿ ನೀರಾಯ್ತು

ನಿನ್ನ ಮರೆಯಬೇಕೆಂದಿದ್ದೆ

ಆದರೆನ್ನ ಮನದಲಿ

ಕವನ ಶುರವಾಯ್ತು

ನಿನ್ನ ಅಂದು ನಾ ಜರಿದಿದ್ದೆ,

ಆದರಿಂದು ,

ನನ್ನ ಏಕಾಂತವ ಮರೆಸಲು

ನೀ ಸವಿ ನೆನಪುಗಳ ಉಳಿಸಿದ್ದೆ !

-@(-ಗಣಿ -)@-
***********************************************************************************************

ಸಾಂತ್ವಾನ

***********************************************************************************************

ಅತ್ತುಬಿಡು ಗೆಳೆಯ   

ಕಣ್ಣೀರು ಬತ್ತಿ 

ಹೋಗುವ ತನಕ !

ಮನದಾಳದ ನೋವು 

ಹೊರ ಹಾರುವ ತನಕ !

-@(-ಗಣಿ -)@-

***********************************************************************************************

ಮೊದಲು ಮಾನವನಾಗು

***********************************************************************************************

ನಿನ್ನ ಮನದ 

ಕಸವ ರಸವಾಗಿಸುವ 

ಕಾರ್ಯದಲಿ ನೀ 

ತೊಡಗು ,

ನಿನ್ನ ಭಕ್ತಿಯೆಂಬ 

ಭಾವದಲಿ ನೀ 

ಮುಳುಗು ,

ನಿನ್ನ ನೀ

ಅರಿಯಲು

ಮುಂದಾಗು,

ಮೊದಲು ಮಾನವನಾಗು !!
-@(-ಗಣಿ -)@-

***********************************************************************************************

ಕಲೆಯ ಭಕ್ತಿ

***********************************************************************************************

ನಾ ಚಿತ್ರಗಾರನಲ್ಲ,

ಆದರೂ  ಚಿತ್ರ ಬರೆಯುವೆ !

ನಾ ಕವಿಯಲ್ಲ ,

ಆದರೂ  ಕವನ ಬರೆಯುವೆ !

ಚಿತ್ರ ಬಿಡಿಸಿ ,ಅದಕೆ 

ಕವನ ಪೋಣಿಸಿ ಹೇಳುವ 

ಪರಿಯಂತೂ ನನಗೆ 

ತಿಳಿದೇ ಇಲ್ಲ !! ಆದರೂ 

ಆ ಪ್ರಯತ್ನವ ನಾ

ಮಾಡದೆ ಬಿಡೆನು!


-@(-ಗಣಿ -)@-

***********************************************************************************************

ವಿಪರ್ಯಾಸ

***********************************************************************************************

   ಮನದೊಳು ಏಳುವ 

   ಅಲೆಯ ರಭಸಕೆ

   ತಡೆಯೊಡ್ಡುವ ನಾವಿಕ 

   ನೀನಾಗ ಬಯಸಿದರೆ, 

   ನಿನ್ನಿಂದಾದ ಅಲೆಯು,

   ಅಪ್ಪಳಿಸದೇ ಮುದ್ದಿಸುವುದೇ !!

  -@(-ಗಣಿ -)@-

***********************************************************************************************