ಆತ್ಮಲಿಂಗ

*********************************************************************************************** ಆತ್ಮದ ನಡೆ ಸರಿಯಾಗಿದ್ದೆಡೆ
ಮನಸೆಲ್ಲಾ ದೇವಾಲಯದಂತೆ
ಧೈರ್ಯದಿಂ ಮುನ್ನುಗ್ಗುವ ಮನಕೆ
ದೈವದ ಬಲ ಸದಾ ಇರುವುದಂತೆ

ಕಣ್ಣ ರೆಪ್ಪೆ
ತೆರೆದರೂ ನೀನೇ
ಮುಚ್ಚಿದರೂ ನೀನೇ
ಅದುವೇ ನೇತ್ರವೆಂಬ ಆತ್ಮಲಿಂಗ
ಸಮರ್ಪಿಸಿರುವೆನು ನಿನಗೆ
ದೇವಾ...
ಎನ್ನಯ ಈ ಅಂತರಂಗ
ಈ ದೇಗುಲದೊಳು
ಭಕ್ತಿಯನ್ಹೊರತು
ನಾನೇನನೂ ಬೇಡೆನು
ಓ ಹರನೇ
ಸಲಹಿ ಕಾಪಾಡೆನ್ನ ಮನವನು.
*********************************************************************************************** 

ಪ್ರಾರ್ಥನೆ!

***********************************************************************************************
ರವಿಯೆಂಬ ಜ್ಞಾನಜ್ಯೋತಿಯು 

ನಶಿಸಿದೊಡೆ;

ನೆರಳಿನಂತಿರ್ಪ ಮನವು 

ಪೂರ್ಣ ಶರೀರವ ಆವರಿಪುದು! 

ಕಾಣದಿಹುದೋ ಎನ್ನ ಛಾಯೆ

ಸುತ್ತಲೂ ಬರೀ ಕಗ್ಗತ್ತಲು!

ಬೆಳಕ ಅನುಗ್ರಹಿಸೋ ತಂದೆ 

ಆತ್ಮಜ್ಯೋತಿಯ ಉರಿಸಲು 

ಎನ್ನ ಅಸ್ತಿತ್ವವ ಬೆಳೆಸಲು!

ಕೊಳಕು ದೇಹದ ಹೊಲಸು
ಭಾವವನೆಂದಿಗೂ

ಸುಳಿಯಗೊಡದಿರು!

ಆತ್ಮಸ್ಥೈರ್ಯವೆಂಬ ತೈಲವ 

ನೀ ನನ್ನಲ್ಲುಳಿಸೋ ಭವ ಹರನೇ 

ಸದಾ ನಿನ್ನ ನಾಮವ ಜಪಿಸುವೆನು!

ಮಣ್ಣಲಿ ಮಣ್ಣಾಗುವ ಮುನ್ನ
ಈ ದೇಹದಲೊಮ್ಮೆಯಾದರೂ
ಬಂದು ನೆಲೆಸೋ ದೇವಾ; 
ಈ ದೇಹಾತ್ಮಕೆ ಪರಿಪೂರ್ಣತೆಯ 
ಕರುಣಿಸೋ ಮಹಾದೇವ!

~ ಜಿ.ಪಿ.ಗಣಿ~

***********************************************************************************************

ಸಮರ್ಪಣೆ

***********************************************************************************************
ಮನದೊಳಗಿನ ಆಸೆಯೆಂ
ದಮನಗೊಳಿಸೈ
ಪರಮಾತ್ಮನೇ !
ಆಸೆಯ ಕೆಂಡವಂ ಹೊಸೆದು
ಅದರ ಬೂದಿಯೊಳ್
ಮಜ್ಜನಗೈದು
ನಿನ್ನ ನಾಮವೆಂಬ ಭಕ್ತಿಯೊಳ್
ಜ್ಞಾನದ ಜ್ಯೋತಿಯಂ ಉರಿಸೈ
ಜಗದೋದ್ದಾರಕನೆ !
ಅರೆಗಳಿಗೆಯ ಸುಖಕಿಮ್
ತಿಲಾಂಜಲಿಯನಿತ್ತು
ನಿನ್ನ ಜಪಿಸುತ ಆರಾಧಿಸುವೆ
ಸ್ವೀಕರಿಸೈ ಎನ್ ಅಂತರಂಗದ ದೇಗುಲವನು !

~ಜಿ.ಪಿ.ಗಣಿ~
***********************************************************************************************