ಭವತಿ ಭಿಕ್ಷಾಂದೇಹಿ!!

***********************************************************************************************
ಗೋಡೆಗಳ ಪದರಗಳು
ಹೆಚ್ಚುತಲಿವೆ
ದಿನವೂ...
ನಾ ಮುಂದು ತಾ ಮುಂದೆಂದು
ಸರಣಿಯಲಿ ಬರಲು
ಆರ ಬರಹದ ಘಮಲನು ಸವೆಯಲಿ
ಆರ ಪಟಕೆ ಬಿಂಬವಾಗಲಿ
ಹಸಿದ ಮನದ ಹೊಟ್ಟೆಗೆ
ವಿವಿಧ ಬಗೆಯ ರುಚಿ ರುಚಿಯ
ಹಬ್ಬದೂಟ
ಅಲ್ಲಲ್ಲಿ ಚೂರು
ಉಪ್ಪು
ಹುಳಿ
ಖಾರ
ಏನು ಮಾಡಲಿ ಮರುಳೆ
ಉಂಬುವುದಕಿರುವುದು
ಕಿರಿದಾದ ಮಂದಮತಿಯ
ಉದರವು...
ಫೇಸುಬುಕ್ಕಿನ ಗೋಡೆ
ಬಾಣೆಲೆಯಲಿ
ಬಿದ್ದದಷ್ಟೋ ತಿನಿಸುಗಳಿಗೆ
ಎನ್ನ ಮೇಲಿವೆ ಸಹಜ ಮುನಿಸು
ಅಲ್ಪ ಅಣು ಗುಲಗಂಜಿ wink emoticon
ಈ ಹೃದಯ ಸ್ವೀಕರಿಸುವುದೆಲ್ಲವನು
ನಿಮ್ಮಯಾ ಸರದಿ ಬರುವವರೆಗೂ ...
ಸಂತನಿವನು ಆದರಿಸಿ ನಿಮ್ಮೊಲವಿನ
ಆದರಾತಿತ್ಯದೊಳು...

~ಜಿ.ಪಿ.ಗಣಿ~
***********************************************************************************************

ಅವರ್ ಬಿಟ್ ಇವರ್ ಬಿಟ್ ಇನ್ಯಾರ್ ?

***********************************************************************************************
ವಾಟ್ಸಪ್ ವಡ್ರ (ವಾವ): ಅಲ್ಲ ಕಲ್ಲ , ಅದೇಟ್ ಕಿತ ಕಾಲಿ ಕುಂತಿವ್ನಿ. ಈ ಬಡ್ಡೆತದ್ ಮನ್ಸು ಅದೇನ್ ಆಟ ಆಡ್ತದೆ ಅಂತಿನಿ. ವಾಟ್ಸಪ್ನಾಗೆ whatsup ಅಂತ ಅಪ್ಪು ಡೌನು ಮ್ಯಾಲಿಂದ ಕೆಳಿಕಿ ಟಚ್ ಸ್ಕ್ರೀನಾಗೆ ಒತ್ತುತಾನೆ ಇರ್ತದೆ.

ಫೇಸ್ಬುಕ್ ಗಡ್ರ (ಫೇಗ): ಸುಮ್ಕಿರ್ಲಾ ವಡ್ರ! ನಾನು ಫೇಸ್ಬುಕ್ನಾಗೆ ಲೈಕ್, ಕಾಮೆಂಟು ಶೇರು ಎಲ್ಲಾ ಮಾಡ್ತಿವ್ನಿ. ನನ್ಮುಂದೆ ನೀ ಏನಾರ ಯೋಳು ಫೇಸ್ಬುಕ್ಕೆಯಾ ಗ್ರೇಟು.

ವಾವ: ವಾಟ್ಸಪ್ಪೆ ಗ್ರೇಟು!!
ಫೇಗ: ಫೇಸ್ಬುಕ್ಕೆ ಗ್ರೇಟು!!

ಮಾತಿನ ಕುಸ್ತಿ ಹಿಂಗೆ ನಡೀತಾ ಇತ್ತು ... ಆಮ್ಯಾಕೆ ಬ್ಯಾಬ ಮಾತ್ ಸುರು ಮಾಡ್ತನ್ ನೋಡ್ರಿ...

ಬ್ಯಾಲೆನ್ಸ್ ಬಸ್ಯ (ಬ್ಯಾಬ): ಅಲ್ಲ ಬಡ್ಡಿವೆ, ಬೆಳ್ಗೆ ಬೆಳ್ಗೆ ಹೋಗೋ ಟೈಮ್ನಾಗ್ ಅದೇನ್ರುಲ್ಲ ನಿಮ್ದು?

ವಾವ : ಅಲ್ಲಲೇ! ನೀನಾ ಹೇಳ, ವಾಟ್ಸಪ್ನಾಗೆ
ಕಾಲ್ ಮಾಡ್ಬೈದು, ಮೆಸೇಜ್ ಕಳ್ಬೈದು, ಫೋಟೋ, ವೀಡಿಯೋ, ಸಾಂಗು ಎಲ್ಲಾ ಶೇರ್ ಮಾಡ್ವೈದು ಗ್ರೂಪ್ನಾಗ್ ಕುಂತ್ ಕಾಳ್ ಹರ್ಟಿ ಹೊಡಿಬೈದು ಅಂತದ್ರಾಗೆ ಅವ ಹೇಳ್ತನ ಫೇಸ್ಬುಕ್ಕೆಯಾ ಗ್ರೇಟು ಅಂತ.

ಫೇಗ: ಸುಮ್ಕಿರ್ಲ ಕಂಡಿದನಿ ಕನ್ನ... ಫೇಸ್ಬುಕ್ನಾಗೆ ಲೈಕ್ ಕಾಮೆಂಟು ಶೇರು ಅದೇಟ್ ಜನ ಮಾಡವೆ ಅಂತ ತೋರ್ಸ್ತದೆ ಲೆಕ್ಕ ಹಾಕಂಗೆ ಇಲ್ಲ ಗೊತ್ತ ನಿಂಗೆ. ಅದೆಷ್ಟ್ ಬೇಕಾರ ಫ್ರೆಂಡ್ಸ ಮಾಡ್ಕಾಬೈದು. ವಾಟ್ಸಪ್ಪು ನಂಬರ್ ಕಳ್ದೋದ್ರ ಯಾನ ಮಾಡದು ...

ಬ್ಯಾಬ: ಅಲ್ಲ ಕಂಡ್ರುಲ್ಲ.. ಈ ಫೇಸ್ಬುಕ್ ವಾಟ್ಪ್ಸಪ್ಪು ಅಂತ ಅದ್ಯಾವ್ ಹಾಳ್ಗೆರೆ ಹೈದಾ ಕಂಡ್ ಹಿಡುದ್ನೋ.. ಕುಂತ್ರು ನಿಂತ್ರು ಬರಿ ಒತ್ತದೆಯಾ ಕ್ಯಾಮೆ... ಅವ ಎಲ್ಗೋದಾ? ಇವ ಎಲ್ಗೋದಾ ? ಇವ ಏನ್ಮಾಡ್ದ ?ಅವ ಎನ್ಮಾಡ್ದ?.. ಇವ್ಳು ಹೆಂಗವ್ಳೆ, ಅವ್ಳ ಸಂದಾಗವ್ಳೆ.. ಇದೇ ಆಗೋಯ್ತು. ನೆಮ್ದಿಯಾಗಿ ಹೋಗೋಕು ಬಿಡಕ್ಕಿಲ್ಲಾ. ನಿಮ್ದುನ್ ನೀವ್ ತೊಳ್ಕೊಳ್ಳೊದ್ ಬಿಟ್ಟು ಬ್ಯಾರ್ಯೋರ್ದೆಲ್ಲಾ ಯಾಕ್ರುಲ್ಲಾ ನಿಮ್ಗೆ... ಅದ್ ಹೋಕಳ್ಲಿ ನೇಗ್ಲಿಟ್ಕಂಡು ಉಳೋಕೋಗ್ರುಲ್ಲಾ ಅಂದ್ರೆ ಮೊಬೈಲ್ ಇಟ್ಕಂಡ್ ಒತ್ಕೋ ಕುಂತವೆ ... ತೂ ನಿಮ್ ಮೊಕಕ್ಕಿಷ್ಟು... ಉಡ್ದಾರಾ ಗಟ್ಟಿ ಇಲ್ದೆ ಇದ್ರು ಉದ್ದಾರಾ ಆದವಾ ಇವು. ಹಾಳ್ಗೆರೆವು... ಮಾಡೋ ಕ್ಯಾಮೆ ನೆಟ್ಟಗೆ ಮಾಡ್ರುಲ್ಲಾ.. ಮಂಗ್ ಬಡ್ಡಿವೆ. ಮೊಬೈಲ್ನ ಸೈಡ್ಗಿಟ್ಟು ಐಲ್ಗಳಂಗಾಡದ್ ಬುಡಿ. ಉಡ್ದಾರನು ಗಟ್ಟಯಾಯ್ತದೆ. ದೇಸನು ಉದ್ದಾರ ಆಯ್ತದೆ.

‪#‎ಕಾಲಿದೋಸೆ‬

~ಜಿ.ಪಿ.ಗಣಿ~
***********************************************************************************************

***********************************************************************************************

ಜಡ್ಡು ದೇಹದ 
ಪೊರೆ ಕಳಚುವ ಹಬ್ಬ
ಮನೆ ಮನೆಗೆ ತೆರಳಿ
ಮುದ್ದು ಮುದ್ದು 
ಪುಟ್ಟ ಗೌರಿಯರು
ಸಂತಸದಿ ಎಳ್ಳು ಬೀರುವ ಹಬ್ಬ
ಎಳ್ಳು ಬೆಲ್ಲವ ಜಗಿದು
ಮತ್ತೆ ನವ ಕಾಂತಿಯ
ಚೈತನ್ಯವ ತರುವ ಹಬ್ಬ

~ಜಿ.ಪಿ.ಗಣಿ~
***********************************************************************************************

ಮಾಯಾ ಶಕ್ತಿ (Law of conservation of energy)

***********************************************************************************************
ಜನನದ ಬಳಿಕ ಜನಕನ
ವೀರ್ಯದ ಹೆಸರು ತಿಳಿದಿಲ್ಲ
ತನ್ನ ರೂಪವನದು ತೊರೆದು
ತನ್ನೊಳಿನ ಶಕ್ತಿಯನು
ವಿಂಗಡಿಸಿ ವಿಂಗಡಿಸಿ
ಪಂಚಭೂತಗಳನೊಂದೊಡಲ
ಸೂರಿನಡಿಯಿರಿಸಿ
ಸಂಬಂಧವನು ಬೆಸೆದಿಹುದು...
ಪಂಚೇಂದ್ರಿಯಗಳೆಂಬ
ಶಸ್ತ್ರಾಸ್ತ್ರಗಳನು
ಭ್ರಮೆಯ
ಮಾಯಾಪಂಜರದೊಳಿಟ್ಟು
ಸುಖ ದುಃಖವೆನುವ
ಕುರುಡು ಚದುರಂಗವನಾಡಿಸಿ
ಜಗದ ಶಕ್ತಿಯನು ಜಗಿಸಿ
ಚೇತನ ಶಕ್ತಿಯನು ಅಗೆಸಿ
ಒಡಲುಡುಪಿನೊಳಹೊರಗನು ಒಗೆಸಿ
ಹಿಂಡಿ ಹಿಂಡಿ ಶಕ್ತಿಯನು
ಕುಂದಿಸಿ-ಮಥಿಸಿ-ಶಪಿಸಿ-ಹರಸಿ-ಶೋಧಿಸಿ
ಪಂಚಭೂತಗಳಲೈಕ್ಯವಾಗುವ
ಮತ್ತೊಂದು ಶಕ್ತಿಗೆ ಹೆಸರಿಹುದೆ?
ಉಸಿರಿಹುದೆ?
ಆದಿ-ಅಂತ್ಯವಿಹುದೇ?

~ಜಿ.ಪಿ.ಗಣಿ~
***********************************************************************************************

ಜ್ಞಾನೋದಯ! (Enlightenment)

***********************************************************************************************
ಕರೆಯುತಿದೆ ತನ್ನೆರಡು
ಬಾಹುಗಳಾಲಿಂಗನಕಾಗಿ
ಅರೆ ಉಸಿರನು ಪೂರ್ಣಗೊಳಿಸಲು
ಅಣು ಅಣು ಜೀವಿಯ ಬೆಸೆಯಲು
ದೇಹಾತ್ಮ ಒಂದಾಗಿ
ಪರಮಾತ್ಮನ ಜನನವಾಗಲು...
~ಜಿ.ಪಿ.ಗಣಿ~
***********************************************************************************************

***********************************************************************************************
ಬೆಳಕ ನೋಟದಲಿ
ನಿರ್ವಸ್ತ್ರದಿ 
ಬಯಲಾದ
ಜಡ ದೇಹವು
ಕತ್ತಲೆಯನು ಸ್ವಾಗತಿಸಿಹುದು
ನಿರ್ವಿಕಾರ
ಆತ್ಮವನು
ಸೇರಲು
~ಜಿ.ಪಿ.ಗಣಿ~
***********************************************************************************************

ಮುಂಗುರುಳ ಮೌನ!

***********************************************************************************************
ಎಲ್ಲಿದ್ದೆಯೋ ಓ ಒಲವೆ
ಹೆಂಗರುಳನೊಲಿಸಿದೆ
ಮನದ ಹೆಬ್ಬಾಗಿಲಲಿ
ನಿನ್ನಯ ಮುಂಗುರುಳೆ ತೋರಣ
ಹೃದಯಂಗಳದಿ ಮಗುವಂತೆ
ಆಡುವಾ ನಿನ್ನಯ ಮುದ್ದಾದ
ಮೊಗಕೆ ಏನೆಂದು ಹೆಸರಿಡಲಿ...
ಭಾವನೆಯ ಸಾಗರದಲೆಗಳು
ಅದೆಷ್ಟು ಎತ್ತರಕೆ ಜಿಗಿದಿಹವೋ...
ಪೊರೆ ಕಳಚಿ ಹೊರ ಬರುವ
ಚಿಟ್ಟೆಯಂತೆ ಜೀವನೋತ್ಸಾಹ
ನಿನ್ನೊಂದೊಂದು ಪಟಗಳಲೂ!!!

~ಜಿ.ಪಿ.ಗಣಿ~
***********************************************************************************************

ಬಾಲ್ಯದ ಸವಿ ನೆನಪು ಈ ಮಳೆಯ ಚಳಿಯಲಿ!

***********************************************************************************************
ಜಿಟಿ ಜಿಟಿ ಮಳೆಗೆ ರಕ್ತವೆಲ್ಲವೂ
ಹೆಪ್ಪುಗಟ್ಟಿ ಹಿಡಿದ ಹಾಸಿಗೆಯಿಂದ
ಏಳುವಂತಿರಲಿಲ್ಲ ...
ನೆನೆ ನೆನೆದು ಲೊಳ ಲೊಳಲೆಂದು
ನಾಸಿಕದಿ ಹೊರಹರಿದುಬರುತ್ತಿತ್ತು
ಮೂಗಿನ ಹೊಳೆಯು...
ತಲೆ ಹಿಡಿದುಕೊಂಡಿತ್ತು
ಕಿವಿಯ ಗವಿಯೊಳಗೆ
ತಂಗಾಳಿ ಹೊಕ್ಕಿ ...
ಶಿರಕೆ ಮಂಗನ ಟೋಪಿ ಧರಿಸಿ
ಹಣೆಗೆ ಅಮೃತಾಂಜನ ಮೆತ್ತಿ
ನಸೆಯ ಮೂಸಿ ಸೀನುತ್ತ
ಬೆಚ್ಚನೆಯ ಸ್ವೆಟರನು ತೊಟ್ಟು
ಕುರಿಗಂಬಳಿಯ ಹೊದ್ದಿಕೊಂಡು
ಗುಡುಗಿನ ಶಬ್ದವ ಕೇಳಿ
ಯಮನ ಚಾವಟಿಯೇಟೆಂದು
ಕೋಣನ ಸವಾರಿಯ ಮಾಡುತಿರುವನೆಂದು
ಅಜ್ಜಿಯು ಗುಡುಗುತ್ತಿದ್ದಳು...
ಭಯದಿ ಮುದುರಿಕೊಂಡು
ಸಿಡಿಲು ಗುಡುಗಿನ ಜೋಗುಳದಿ
ಮಲಗಿದೆಡೆ ಸ್ವರ್ಗವನಪ್ಪಿದಾನಂದ!!!!

~ಜಿ.ಪಿ.ಗಣಿ~
***********************************************************************************************

ಹುಣ್ಣಿಮೆಯ ಚಂದ್ರ

***********************************************************************************************
ಹುಣ್ಣಿಮೆಯಂದು ಕಾಣುವ ನಿನ್ನ
ಗುಂಡಾದ ಮೊಗವ ಮುದ್ದಾಡುವ ಆಸೆ
ಕಪ್ಪು ಕಣ್ಣ ಗುಡ್ಡೆಗಳು ನಿನ್ನಂದದಿ
ಬಿಳುಪಾಗುವುದನು ಎದೆಗಪ್ಪುವಾಸೆ
ಬೆಳಕಲೂ ಜ್ವಾಲೆಯಾಗಿ ಉರಿಯದೆ
ತಂಪನೀಯುವ ನಿನ್ನ ಶಾಂತತೆಗೆ
ನನ್ನನೇ ಅರ್ಪಿಸುವಾಸೆ!

~ಜಿ.ಪಿ.ಗಣಿ~
***********************************************************************************************

***********************************************************************************************

ಹೆಣ್ಣನು
ಹಣ್ಣೆಂದು ತಿಳಿದೆಡೆ
ರುಚಿಸಬೇಕೇನಿಸುವುದು
ಹೂವೆಂದುಕೊಂಡೆಡೆ
ಮುಡಿಯಬೇಕೆನಿಸುವುದು
ತಾಯೆಂದುಕೊಂಡೆಡೆ
ಪೂಜಿಸಬೇಕೆನಿಸುವುದು
ಮಗುವೆಂದುಕೊಂಡೆಡೆ
ತಾಯಿಯ ಭಾಗ್ಯ ದೊರೆವುದು
ನೋಡುವಾ ನೋಟದಲ್ಲಡಗಿಹುದು
ಮನಗುದುರೆಯ ಲಗಾಮು...
ಹುಚ್ಚೆದ್ದು ಕುಣಿಯದಂತೆ
ಹಾಕಬೇಕು ಕಣ್ಣಪಟ್ಟಿಗಳನು
ಹರಿಹರರನು ಜಾಗೃತಗೊಳಿಸೈ
ಧರ್ಮ ಮಾರ್ಗದೆಡೆಗೆ...!

~ಜಿ.ಪಿ.ಗಣಿ~
***********************************************************************************************

***********************************************************************************************

ಭೂಮಿಗೂ ಕತ್ತಲೆಯ ನೋವಿಹುದು
ಲೋಕವದು ಅಂತರಂಗ ದರ್ಶನ
ಮೋಡಗಳ ಪೊರೆಯುಹುದು...
ತಿಳಿಯಾದೆಡೆ
ಮುದ್ದಾದ ಚಂದಿರನ ಮೊಗವಿಹುದು
ಧೃವತಾರೆಗಳ ಮಿನುಗುವ ನೋಟವಿಹುದು
ಕಾಣದಾ ಚೇತನನ ಬ್ರಹ್ಮಾಂಡವಿಹುದು
ಅಗೋಚರದ ಅವನಾಜ್ಞೆಯಿಹುದು

ಭೂಮಿಗೂ ಬೆಳಕಿನ ನಲಿವಿಹುದು
ಬಹಿರಂಗದ ಅರಿವಿಹುದು
ಇಂದ್ರಿಯಗಳ ಸಮ್ಮಿಲವಿಹುದು
ತನ್ನ ಸೌಂದರ್ಯದ ದಿವ್ಯದರುಶನವಾಗಿಹುದು

ಹಗಲ ನಶೆಯಲಿ ಇರುಳ
ಮರೆತರಾದೀತೇ
ಇರುಳ ಕೊರಳಲಿ
ಬೆಳಕಿಗುರುಳ ತೊಡಿಸಿದರಾದೀತೇ
ಕಪ್ಪು ಅರಿವಿನ ದೀವಿಗೆ
ಬೆಳಕು ಚೈತನ್ಯಕೆ ಸಾರಿಗೆ!!

~ಜಿ.ಪಿ.ಗಣಿ~
***********************************************************************************************

ಕತ್ತಲಲಿ ಭ್ರೂಣವಾಗಿ
ಹಗಲು-ರಾತ್ರಿಯ ಜಗಕೆ ನಾ ಬಂದೆ ಮಗುವಾಗಿ

ಹುಟ್ಟಿದಾಗ ಕನ್ನಡಿಯಲಿ ನೋಡಿದರೆ
ಕಾಣುತಿತ್ತು ಬರಿ ಬೋಳು ತಲೆ!!

ಪ್ರೌಢ ಹದಿ ಹರೆಯದಿ ಕಂಡಾಗವದು
ಕರಿಗೂದಲಿನ ತಲೆ!!

ಮುದಿ ಹರೆಯದಿ ಕಂಡಾಗ
ಆಗಿತ್ತು ಅದು ಬಿಳಿಗೂದಲಿನ ತಲೆ!!

ಸಾಯುವಾ ಮುನ್ನ ಕಂಡಾಗ
ಅಲ್ಲೊಂದು ಇಲ್ಲೊಂದು ಮಾಸಿರುವ ಸಣ್ಣಗೂದಲಿನ ತಲೆ

ನಂತರ ಪರರು ನೋಡುತ್ತಿದ್ದರು
ಎನ್ನ ಪಟವನು ಕನ್ನಡಿಯಾಗಿ
ಕಾರಣ ಎನ್ನ ಆತ್ಮಶರೀರವಾಗಿತ್ತು;
ಎರಡು ಹೋಳು!

ಅರಿವಳಿಕೆಯ ನಿದಿರೆ

***********************************************************************************************
ನಿದ್ರಾ ದೇವಿಯು
ನಿತ್ಯ ರಾತ್ರಿಯೋಳ್
ಮೆದುಳಿನೊಳ ತಲುಪುವಳ್ ... 
ಮಾಯಾಂಗಿನಿಯವಳು!
ಎನ್ನಾತ್ಮವಂ ಶರೀರದಿಂ
ಜಾರಿಪಿ ಕದ್ದೋಯ್ದು
ಮರಳಲ್ಲೇ
ಜೋಡಿಪಳೆನಗರಿವಾಗುವುದಾದೊಡಂ
ಮಾಯಾ ಅರಿವಳಿಕೆಯದುವೆನಗೆ!!

~ಜಿ.ಪಿ.ಗಣಿ~
***********************************************************************************************

ಮಾಡಿದ್ದುಣ್ಣೋ ಮಹರಾಯ (ಚಪಾತಿ ಚಪ್ ಚಪ್ )

***********************************************************************************************
ಬೆಂಡೆಯಾ ನಾರನುರಿದು
ಒಗ್ಗರಣೆಯಲಿ ಉಪ್ಪು ಖಾರವ ಬೆರೆಸಿ 
ಗೋದಿಹಿಟ್ಟಿನೊಳು ಕುಸ್ತಿಯನಾಡಿ
ಎಣ್ಣೆಯನಚ್ಚುತ ಕಾವಲಿಯಲಿ
ಗೋದಿ ಮೈಯನು ಕಾಯಿಸಿ
ಬೆಂಡೆ ಈರುಳ್ಳಿ ಸೌತೆಕಾಯಿಯಲಿ
ಮಜ್ಜನಗೈದೆಡೆ ಆ ಕ್ಷಣವೇ ಸೊಬಗು

~ಜಿ.ಪಿ.ಗಣಿ~
***********************************************************************************************

'ಸು'ವಾಸನೆ

***********************************************************************************************
ನಿತ್ಯವೂ ಹರಕೆಯಿಲ್ಲದೆ
ತೀರಿಸುವ ನಿತ್ಯಕರ್ಮಕೆ
ಬಡಿದಿದೆ ಹೊಲಸು ವಾಸನೆ
ಹಲಸಾಗಿ ಮುಳ್ಳಿರುವ ಪೊರೆಕೆಯು
ಗುಡಿಸುವುದು ಕಾಣುವಾ ಕಸವನು
ನಾರಿನಾ ನಡುವಿರುವ ತೊಳೆಯ
ಜೀರ್ಣಕೆ ಕಾದಿರುವುದೀ ಉದರದೊಳಿನ
ಕರುಳ ಎಳೆಯು
ತಿನ್ನುವಾ ಬಲಗೈಗೆ ಕೀರ್ತಿ ಒಲವು
ತೊಳೆಯುವಾ ಎಡಗೈಗೆ ಮೂರ್ತಿ ಫಲವು
ಸೇವಿಸುವ ಗಾಳಿಯಲಿ ಅದೆಷ್ಟು ಸುಗಂಧವೋ
ಬಿಡುವ ಗಾಳಿಯಲಿ ಅಳೆಯಲಾರದಷ್ಟು ದುರ್ಗಂಧವೋ
ಕಸದಲಿನ ರಸವೇ
ಹೊರಸೂಸುವ ಇಂದ್ರಿಯಾನುಭವ ಕಣವು
ಕೊಳೆತು ನಾರದಿರೆ
ಹೇಸಿಗೆಯು ಬಾರದಿರೆ
ಗೊಬ್ಬರಕೆ ಅಸ್ತಿತ್ವವೆಲ್ಲಿಹುದು?
ಮೇಲು ಕೀಳೆಂಬುದು
ಬಾಹ್ಯದೊಳಿರುವುದಷ್ಟೇ ಆಂತರ್ಯದೊಳಿಲ್ಲ
ಮೇಲೆಂಬುದು ಇಂದ್ರಿಯಾಲೋಲ
ಕೀಳೆಂಬುದು ಅಂತರ್ಜಾಲ
ತಿಪ್ಪೆಯಾ ಸಗಣಿಯಲಿ ಬರುವುದು ಬೆರಣಿ
ಸುಟ್ಟು ಬಿಸಿನೀರ ತರಿಸಿರೆ ಮೆದುವಾಗುವಳು
ಚರ್ಮವೆಂಬ ತರುಣಿ
ಹೊಲದಳು ನಾರುತ ಬಿರಿಯುವಳು ತಿನ್ನಲನ್ನವನು ಧರಣಿ
ಕರ್ಮಯೋಗಿಗಳು ನಾವಿಲ್ಲಿ ನೆಪವಾಗಿ
ಕೇವಲ ಕಾಲದ ಹಸಿವಿಗಾಗಿ...

~ಜಿ.ಪಿ.ಗಣಿ~
***********************************************************************************************

ಧ್ಯಾನ!

***********************************************************************************************

ಮೌನ ಧ್ಯಾನದ್ಯಾತ್ರೆಯೋಳ್
ಕತ್ತಲ ಗವಿಯನ್ ಹೊಕ್ಕು
ಪಂಚೇಂದ್ರಿಯಗಳ ಅಸ್ತಿತ್ವದ
ದರುಶನವು ಕಾಣತಿರ್ಪುದು
ಶೂನ್ಯದಿಂ ಅನಂತದೆಡೆಗೆ...

~ಜಿ.ಪಿ.ಗಣಿ~
***********************************************************************************************

***********************************************************************************************
ಸದಾ ಮಗುವಾಗಿ
ನಗುವ ಹೂವಾಗಿ
ಹೊಳೆವ ರವಿಯಾಗಿ
ಶಾಂತ ಶಶಿಯಾಗಿ
ಮನದ ಆಗಸದಿ
ಜೋಕಾಲಿಯಾಡುತಿರುವಾಸೆ!!
~ಜಿ.ಪಿ.ಗಣಿ~
***********************************************************************************************

***********************************************************************************************
ಆಗಸದಿ ತಾಯಿ 
ಹೊತ್ತಿರುವಳು ತನ್ನ ಗರ್ಭದೊಳು
ಮುದ್ದಾದ ಶಶಿಯನು
ಮೋಡದ ಕರುಳಬಳ್ಳಿಯ
ಬಿಡಿಸಿ ಹರುಷದ ಮಳೆಯ
ತರಿಸಿ ನಗುವ ತಂದಿಹನಿದುವೇ
ವಸಂತಮಾಸ!!

~ಜಿ.ಪಿ.ಗಣಿ~
***********************************************************************************************

ಬದುಕು ಟಚ್ ಸ್ಕ್ರೀನಿನ ಒಳಗೆ!!!

***********************************************************************************************
ಮೂರೊತ್ತು ಉಂಬೋಣ
ಆಗಾಗ್ಗೆ ಮಜ್ಜನ ಮಾಡೋಣ
ಹಲ್ಲು ಗಿಂಜಿ ಸೆಲ್ಫೀ ಹೊಡೆಯೋಣ
ನಿಂತಲ್ಲಿ ಕುಂತಲ್ಲಿ ಸ್ಟೇಟಸ್ ಅಪಲೋಡ್ ಒತ್ತೋಣ
ಒಂದಷ್ಟು ಲೈಕುಗಳು, ಕಾಮೆಂಟುಗಳು
ನಿಮಿಷಕ್ಕೊಮ್ಮೆ ನೋಟಿಫಿಕೇಷನದ್ದೇ ಚಿಂತೆ
ಅವರಿವರ ಕಾಲೆಳೆಯುವುದೇ ಸಂತೋಷವಂತೆ
ಯೋಚಿಸಲೆರಡು ಸೆಕೆಂಡುಗಳ ಸಮಯಕ್ಕೆ ಬರ!!
ಇದೇನಾಯ್ತೋ ಲೋಕಕ್ಕೆ ಅಂಟುರೋಗದಂತೆ
ಹರಡಿದೆ ಟೆಕ್ನಾಲಜಿಯ ಜ್ವರ!

~ಜಿ.ಪಿ.ಗಣಿ~
***********************************************************************************************

Someಸಾರ!!

***********************************************************************************************
ಋಣಾನುಬಂಧರೂಪೇಣ 
ಪಶು ಪತ್ನಿ ಸುತಾಲಯ
ಮೂರು ಗಂಟು ಬಿಗಿದ ಮೇಲೆ
ಪ್ರೇಮಾಲಯ
ಮಕ್ಕಳಾದ ಬಳಿಕ
ಆನಂದ ನಿಲಯ
ವಯಸ್ಸಾದ ನಂತರ ಅನಾಥಾಲಯ
ಆಯಸ್ಸು ಮುಗಿದ ಮೇಲೆ ದೇವಾಲಯ

~ಜಿ.ಪಿ.ಗಣಿ~
***********************************************************************************************